ප්‍රේමයේ නාමයෙන් මට සමාවෙන්න ........

ඔබ යන්නම ගිහින්.......

  යනවා කියලාවත් නොකියා  ආයෙත් නො එන්නම ඔබ ගිහින්.

       අපි ජීවිතයේ කවරදාකත් මුණගැහෙන්න හිටි මිනිස්සු නෙමෙයි. එකම එක දවසක් ඔබගේ පින්තූරයක් දැකපු මම ඔබට සමානම පුද්ගලයා එක්ක තිබුන බැඳීමට අත්වැල් හෙව්වේ මේ තරම් වේදනවක් විඳින්න නම් නෙමෙයි. සමහරවිට ඒක කුතුහලය මිශ්‍ර හැඟීමක් වෙන්න ඇති. ඒත් අපි නොහිතුව දේවල්ම මේ ලෝකේ වෙන හින්දමද කොහෙද ඔබයි මායි බොහොම හොඳ යාළුවෝ වුනා. කාලයක් ගිහින් ඒ යාළුකම ඊට වඩා බොහෝම බරපතල සම්බන්දතාවයකට පෙරළුනාමත් මම ඔබෙන් ඉල්ලුවේ කවදාටත්, මොනම දේ උනත් අපි හොඳම හොඳ යාළුවෝ වෙන්න ඕනේ කියන එක විතරමයි. ඇත්තම හීනයක වගේ මම ඔබත් එක්ක, හීන නොවිච්ච හීනයක ඈතට ඈතට ගියේ ජීවිතේ මේ තරම් දරාගන්න බැරි දුකක් ඔබ හින්දා ලබන්න බලාගෙන නම් නෙමෙයි. වෙන ප්‍රේමවන්තයන්ට වඩා අපේ ප්‍රේම කතාව බොහෝම සැහැල්ලුවෙන් වගකීම් වලින් තොරව ගෙවන්න අපි දෙන්නටම ඕන වුනා වෙන්නත් ඇති. ඒ වෙනකොට මම හිටියේ ප්‍රේමයෙන් විඳින්න ඕන ඔක්කොම දුක් විඳලා හින්දා, ඔබයි මමයි අතරෙදි මම මටම දාගත්ත කොන්දේසි බොහොම සීමිත කාලෙකින්ම වෙනස් කරන්න මට සිදු වුනා. ඔව් ඒක මම ආදරේ කියන සීමාව අස්සේ මගේම කරගත්තු ආදරයක් වුනේ ඇසිපිය ගහන්නත් කලින්. ඒ තරමටම ඔබ සුන්දර ප්‍රේමවන්තයෙක් වුනා. කොහේ ගියත් මගේ හිත නතරවුන සංසාරේ එකම මගක ආව පුද්ගලයාගෙන් ඈත් වෙලා මම ඔබ ළඟට ආවේ, මටවත් එහෙම දෙයක් වෙන්න පුළුවන් කියන විශ්වාසයෙන් නෙමෙයි. කවරදාකවත් කාගෙවත් ළඟ නතර නොවූ මගේ හිත ඔබ අයිති කරගත්තේ උපන් තැන ඉඳන්ම ඒ බැඳීම ප්‍රශ්න පත්තරයක් කරමින්.

     කොහොමටත් සීනි බෝල ආදර කතා වලට මගේ ජීවිතේ ඉඩක් තියාගන්න මට පුළුවන්කමක් තිබුනේ නෑ. අපි දෙන්නා අතර තිබුන නොගැලපීම් වගේම ගැලපීම් එක්ක මම අනන්තවත් ඒ ආදරය ගැන අවුල් වුන එක පුදුමයකුත් නෙමෙයි. ගෑණියෙක් මිනිහෙක් එක යහනක නිදාගත්ත පමණින්ම ආදරේ ඒක ජීවිතේ කියන්න තරම් සීනි බෝල කතා මට කවදාවත් තිබිලා නෑ. වටිනාම දේ උනේ ඔබ ආදරය ලබන්න වගේම ආදරය කරන්නත් දැනගෙන හිටපු කෙනෙක් වුන එක. එහෙම නොවුනා නම් මම ඔබ ළඟ නතර වෙන්නේ නෑ කියලා මම ඉර හඳ වගේ විශ්වාස කරන දෙයක්. ඔබ ලාංකීය සමාජේ ඉන්න රාමුවකට කොටු වුන මිනිහෙක් නොවුන එකම මගේ හිත දිනාගන්න මූලිකම හේතුවක් වෙන්නත් ඇති. සමහරවිට ඒ ඔබයි මමයි අතර තිබුන තේරුම් ගැනීමේ හා බෙදාගැනීමේ හැකියාව හින්දා වෙන්නත් පුළුවන්. කාගෙවත් ළඟ ආපහු ආදරේ හින්දා දිය නොවෙන්න හිටපු මම ක්ෂණයකින් ඔබ ඉස්සරහා දිය වුනේ හරියට උණුවතුරට දාපු හිම බෝලයක් වගේ.....

    රෑ එලිවෙනකම් ඔබ නිදි අතරේ ඔබ දිහා බලාගෙන හිටපු මම ඒ හැම අවස්ථාවකදිම කල්පනා කලේ අපි කොහේ කොතනක නතර වෙන අයද කියලා. ලෝකේ දෙපැත්තක හිටපු අපි දෙන්නා, රැකියා තත්වයන් මත එකම තැනකට ගන්න දෙවියන්වහන්සේටවත් පුළුවන්කමක් නෑ කියන එකත් මම දැනන් හිටියා. ඒ හැම වෙලාවකම මගේ අසරණකම මම දරාගත්තේ ඔබට වැඩි පුර ලංවෙලා. පූස් පැටියෙක් වගේ මම ඔබේ උණුසුමට තුරුල් වුනේ දරාගන්න බැරි තරම් මම ඔබට ආදරෙ කල හින්දමයි. මටත් හොරෙන් ඒකට මම නිර්වචන දුන්නා. ඔව් කොල්ලෙක් ඉස්සරහා, කොල්ලෙක් හින්දා, පසු තැවෙන තීරණ ගන්න එක මම නතර කරලා හිටියේ. ඒත් ඔබත් එක්ක ඒවත් මටම කරගත්ත බොරු පොරොන්දු වුනා. ඒත් හදවතට එහා ගිහින් බුද්ධියෙන් වැඩ කරපු එකම තැන එතනද කොහෙද හින්දා මට වැරදුනා වෙන්නැති. ඔබ මගේ කරගන්න, ඔබ ළඟින් ඉඳන් මගෙ කරගන්න මට කරන්න පුළුවන් එකම දේ වුනේ ඔබ ඉන්නා තැනකට වසරකට කිහිප පාරක් වැඩි පුර පියාඹන එක විතරමයි.  අවුරුදු ගණනාවක් පුරා මම ඔබව හොයාගෙන ආවේ මටත් වඩා මම තේරුම් නොගත් මගේ ආදරය ඔබ අරන් ගිහින් තිබුන හින්දා.
       ඒත් හැමදාම වගේ ජීවිතේ මට හීන ගෙනත් දීලා මගේ ඉස්සරහාම පොලවේ ගහන්නේ කෑලි හොයාගන්නවත් බැරි තරම් මාව අවුල් කරලා කියලා මම හැමදාම දැනන් හිටපු දෙයක් නේ. ඔබ වෙනදා වගේම ඇවිත් මට ඈත් වෙන්න නොදී මාව ඇදලා තියාගත්ත රික්තයක් නොවුනා නම්..... අන්තිම මොහොතේ ඇවිත් අපි තීරණයක් ගමු නොකීව නම්...... ඔබේ නිදහසට වචනයකින්වත් බාධා නොවුන මම මේ තරම් අවුල් වෙන එකක් නෑ. හෙට අනිද්දට ඔබව හොයාගෙන එන මට ඔබ නැතිව ඔබේ ගෙදරට යන්න, ඔබ නෑ කියලා පිළිගන්න බෑ කියන එක කොයි ලෝකේ හිටියත් ඔබට නොතේරි තියෙන්න බෑ ......

        මම ඔයාට ගොඩාක් වැරදි කලා. ඒත් එකක්වත් මම කලේ දැනගෙන නෙමෙයි. ඔබට සමානම පුද්ගලයා මගේ හිතේ හැමදාම ජීවත් වුන හින්දා ඒ ඔබද, ඔහුද කියලා තේරුම් ගන්න බැරිව මිසක් අසාධාරණයක් කරන්න බලාගෙන නෙමෙයි. අනේ රත්තරන් මට සමාවෙන්න ඒකට. ඔයා හැරි හැරි එන හැම වෙලාවකම මම අවුල් වුනේ මම ඔයාගේ බලාපොරොත්තු එක්ක එකඟ නොවුනේ ඇයි කියන එක ඔයාට වඩා තව තේරෙන කෙනෙක් ඉන්න එකක් නෑ. මට සමා වෙන්න ඔබට බලාපොරොත්තු දීලා ඒ ගැන වගකීමක් නොගත්තට. හීන පස්සේ දුවලා මට මහන්සි වෙලා හිටියේ රත්තරන්. ඒකයි ඒ හැමදේම එහෙම වුනේ......

      ඔයාට කියන්න, ඔයාත් එක්ක බෙදාගන්න මට තව බොහෝ දේවල් තියෙනවා. හෙට අනිද්දට ඔයාගේ ඉස්සරහට ආවම වෙනදා වගේම හිනාවෙලා මාව අවුල් කරත් මාව ආදරෙන් පිළිගන්න ඔබට පුළුවන් නේද? අපේ බැඳීම ඔබේ වචනත් එක්කම සංසාරෙන් එන එකක් වෙන්න ඇති. ඔබ කියපු බුදු දහම මට තාමත් තේරෙන්නේ නැති වුනාට දවසින් දවසට මම ඒ වචන පස්සේ යනවා නැත්නම් මම ඔබ අපි අපිට මේ දේවල් දරාගන්න පුළුවන් වෙන එකක් නෑ. ඔව් බැඳීම් නැති හෙටක් ගැන මාත් ඔබ පස්සේම එන්නම් වෙනදා වගේම ආදරෙන්.....